Salute a totes. Isto es un conto originari in interlingua scribite per me. Isto es un historia de horror.
Vostre comentos e opiniones es multo benvenite.
Bon lectura!
Io pacchettava mi cosas a un sacco a dorso1. Vestimentos, alimento, un sacco a dormir2, cultelleria, mi telephono, le tenta e le cosa le plus importante: confectos geleas. Illos es excellente durante un excursion pro adder energia. Io jectava tote le cosas in le coffro del automobile3.
Io esseva super le puncto de partir pro un excursion solitari. Io habeva planate iste tour pro un longe tempore e esseva multo excitate. Le objectivo esseva pernoctar in un foreste e facer un test de mi nove tenta.
Io observava como citate se cambia lentemente in agros; agros in foreste. Arbores flueva detra vitros de mi automobile. Verdura e nigritia me absorbeva.
Le itinere esseva facile e le viage non durava longemente. Io arrivava al loco de bon hora e stoppava mi carro. Il non esseva permittite cochiar plus longemente – un barriera blocava le via forestal.
Io partiva mi automobile e extendeva mi corpore. Le tempore esseva belle. Io prendeva mi sacco, claudeva le carro e me mitteva in le cammino. Le ventetto cunava arbores.
Illo esseva un foreste pinee - perfecte pro campamento. Un foreste conifere es melior que foliose, proque il ha minus insectos, pro exemplo mosquitos. In un foreste foliose, un strato de folios crea un ambiente avantagiose pro illos.
Io habeva un via satis longe a percurrer. Le plus lontan ab le civilisation – le melior. Io vadeva rapido sur tracia arenose aspirante aromate de aciculas e resina. Le sol perciava foliage e exclarava le cammino. Io observava le belle silva conifere.
Le sacco non esseva multo pesante e io tosto attingeva un parve clariera.4 Al orlo susurrava un rivetto. Aqua luceva fullante contra gris roccas.
Io quattava e submergeva mi mano in aqua fresc. Frigido plenava mi palma. Le aqua esseva clar e semblava munde, ma on non pote biber ab un rivo tam basso super nivello del mar.
Subito un strepito detra mi dorso colpava mi aures. Io me verteva. In un distantia de plus o minus un dozena de metros io videva un par de nigre oculos reguardante me. Cornos super illos e visage coperite con pelle brun. Ante me stava un grande bison. Bison europee plus precisemente, le plus grande animal in le continente.
Illos es minus pesante, ma plus alte que lor cosinos american. Al opposito a lor cognatos, illos vive in forestes, non sur planas. Belle e majestatic animales.
Post le secunde guerra mundial illos deveniva quasi extincte. Le scientistas succedeva salvar los, ma hodie omne bisones europee in tote le mundo origina ab un manata de individuos.
Illo non haberea debite trovar se ibi. Quanto io sape illos non vive a distantia de centos de kilometros. De plus un individuo solitari es un vista multo inusual, proque illos es animales gregari.
“Tu veniva hic pro appaciar sete?” io diceva al direction del bison. “Non se preoccupa. Io non perturbara tu calma.”
Bisones es animales herbivore e usualmente non aggressive, ma pote esser periculose. Il es melior non turbar los e retraher se, si vos incontra un.
Io faceva un passo a retro. Le bison stava immobile e vadeva spectante me. Forsan illo esseva tanto surprendite con ille incontro inexpectate como io. Con su dorso massive illo pareva enorme. Su oculos esseva estraniemente mesmerisante. Io lentemente decedeva.
Il non es un bon idea facer un campamento juxta un fluvio. Fluvio attrahe animales. Animales herbivore veni a biber. Animales carnivore veni a biber o attrahite per animales herbivore. Per consequente tu finira ascoltante sonos estranie tote le nocte.
***
Io continuava mi marcha. Le foreste cambiava su character. Illo deveniva plus dense. Grande spatios regular inter arbores se cambiava in parve e chaotic. Arbores lassava passar minus luce. Isto tote significava que io attingeva un parte del foreste plus vetule e natural – non plantate per manos de homines.
“Io debe vader plus profundemente in le foreste,” io diceva a me ipse.
Tu deberea facer campamento solitari tanto longemente ab civilisation como possibile. Tu probabilemente non vole esser eveliate solitari in le nocte in un foreste per un homine qui te trovava per accidente. Mesmo minus per alcun bibitores post un soirée presso de tu campamento. Homines sempre es predatores pessime e menacia maxime. Al minus isto es lo que io tunc pensava.
Post alcun tempore io attingeva un clariera de magnitude de circa dozenas metros. Le loco esseva perfecte - platte, munde, nulle arbustos o radices. Alcun roccas hic e ibi. Iste clariera essera ben. Il es tempore pro comenciar un campamento.
***
Io erigeva mi tenta. Illo esseva satis grande pro tres personas o duo personas con paccos. Bastante confortabile.
Quando le tenta esseva preste il habeva tempore pro mangiar. Io vadeva assemblar ramos e ramettos ex ambiente. Quando io levava un sic pecia de ligno, per un angulo de oculo io videva un movimento. Mi corde palpitava. Un parve objecto se lanceava pro disparer post un tempore in herba. Illo esseva un serpente.
Es illo un serpente de collar5? Io pensava. No. Io habeva remarcate un zigzag characteristic a su dorso que indicava que illo esseva un vipera. Le sol serpente venenose hic. Isto esseva le prime vice quando io videva un vipera in le natura.
Io reganiava mi sanguine frigide. Il non habeva un ration pro preoccupar se. Viperas es animales timide. Le risco de un morsura per illos non es alte tanto longemente como tu non los turba. Io continuava colliger ligno.
Colligente fomite io trovava plus lapides. Io notava que illos non stava in locos accidental, como io habeva pensate, ma circumfereva le clariera formante alco simile a un circulo. Illos non esseva troppo grande. Un metro de altitude al plus. Es isto un accidente o un producto de manos human? Isto semblava improbabile que illos esseva un creatura natural. De altere latere il non esserea tam facile mover los. Io ponderava proque alcuno se fatigarea pro eriger hic iste petras.
Per medio de un parve serra io secava le ramos. Posteriormente io igniva un foco. Io usava tamben peciettas de cortice de betula, que io habeva colligite in le via. Cortice de betula es extrememente inflammabile; bon pro fomite.
Al veritate ignir foco in un foreste non es totalmente legal, ma io sperava que il finirea sin un pena pecuniari. Io esseva in un remote parte del foreste e non expectava incontrar altere homines, includente foresteros.
Quando io esseva super le puncto de preparar un repasto io subito remarcava alco estranie – nulle strepito de aves, nulle sonos de folios movente se a ventetto, nihil. Iste loco es multo quiete. Troppo quiete. Io pensava. Io non habeva remarcate isto anteriormente. E iste silentio non me placeva. Un aura bizarre permeava iste placia.
Io considerava pro un momento partir ille sito, ma isto esseva tro tarde. Io deberea plicar le tenta, trovar un nove loco e eriger le tenta de novo e il ancora annoctava. Il non habeva un selection: io debeva remaner illac. Ante toto isto non es un grande cosa. Forsan isto es solmente mi imagination, io pensava.
Le sol se poneva e nocte veniva. Io levava mi capite. Io esseva fortunate - le cello esseva clar e plen e astros como sempre longemente ab civilisation. Io probava rememorar constellationes que io cognosceva – Orion, Ursa Major, Sagittario e quatro stellas inconspicue – le Scuto de Sobieski – un constellation del cello meridional, ma in le estate visibile anque in le hemispherio septentrional. Illos me rememorava un de mi cantos le plus favorite – Stellas Distante.
Io mangiava mi cena e me jaceva sur le tapete.6 Jacente in le sacco io remarcava de novo le silentio.
Le foreste durante nocte es surprendentemente alte. Super toto, tu sensos es multo plus acute. Tu audi sonos que tu non audirea durante die. Vento suffla, arbores crepita, animales passa juxta te e age in modo clamorose. A vices illos emitte sonos estranie. Pro exemplo capreolos7 face sonos resimilante latrato multo. Ma io poteva audir nihil.
Io esseva fatigate, proque io habeva percurrite un grande distantia e io tosto cadeva in somno.
***
Io me eveliava quando il ancora habeva nocte, probabilemente ab frigido. Illo esseva inusual. Il es frequente que il face frigido in nocte sub tenta mesmo in estate, ma io esseva revestite in camisa, pantalones e duo pares de calcettas. Io reguardava le horologio - il esseva circa tres horas post medienocte.
Quando io extendeva un mano pro vestimentos additional, sonos estranie ganiava mi aures. Io audiva fracassos quasi que alcuno pesante vadeva apud mi tenta. No, quasi que alcuno vadeva circum le tenta.
Qui pote esser hic a ille tempore? Io habeva vadite multo longe. Nemo deberea trovar se ci. Il ha nulle homines a distantia de multe kilometros. Il non es possibile que alcuno trovava iste loco per accidente. Esque alcuno me traciava? Proque?
Io cercava mi cultro. Illo esseva parve, ma illo es melior que nihil. Que facer? Celar se o escappar? Io ponderava.
Le sonos continuava.
Io decideva remaner quiete e non accender luce. Lentemente, con manos tremulante, io aperiva le tenta un poco e reguardava al exterior. Il esseva tam obscur que io poteva vider practicamente nihil. Quasi que stellas e le luna, que habeva illuminate le ambiente justo poc horas retro, dispareva. Io poteva audir le intruso, ma non perciper le.
Tempore lentava. Io non es secur quante tempore passava; probabilemente medie hora quando le strepitos se cambiava. Le sonos comenciava resimilar ferimentos de un baston de ligno, tanto alte que illo non poteva esser un persona passante.
Io retornava a mi tenta con horripilation, glaciante, choccate e paralysate.
Io pensava super telephonar policia. Io extraheva mi telephono – sin signal. Io esseva troppo profundemente in un foreste.
Post alcun tempore le sonos mutesceva. Io ascoltava nunc le silentio nigre ambiente me e ponderava que habeva justo nunc occurrite. Esque ille joca con me? Proque ille lo face? Que ille vole? Esque ille ha intentiones malitiose? Io pensava. Io probava audir e locar le intruso, ma non poteva.
Obviemente io non vadeva dormir de novo. Io remaneva vigile e vigilante.
Post alcun quartos de silentio io subito audiva voces.
Toto se comenciava con un riso. Le plus espaventante e horripilante riso que io ha audite in mi vita.
Le voce sonava como un voce de un femina, ma il habeva alco incorrecte in isto. Alco inhuman, forsan animalesc.
Io esseva tam choccate, que io non mesmo poteva mover se. Mi membros refusava obedientia. Io poteva solmente ascoltar.
Post le riso, in un altere parte del foreste io audiva sonos resimilante cantar guttural e susurros. Illo esseva multo surrealistic. Io me sentiva quasi que io spectava un film o habeva un incubo. Io poteva sensar horripilation. Sudor frigide appareva a mi dorso.
Io trovava le lampa de tasca e lo accendeva. Luce addeva me corage un poco.
Le voces deveniva intermittentemente plus alte e quiete, ma continuava.
Io habeva un impression que illos resimila un lingua germanic ma io non sapeva le qual. Illos differeva multo ab germano, le sol lingua teutonic ultra anglese, que io pote recognoscer. In omne caso io non poteva comprender un parola.
Quando io recuperava un poco ab le choc io pensava que il forsan es un bon idea registrar le voces. Si io lo supervive, necuno va creder me. Con manos tremulante io trovava mi telephono e activava registration.
Le voces persisteva.
“Ave Maria, plen de gratia, le Senior es con te. Benedicte tu inter feminas e benedicte le fructo de tu sino, Jesus...” io comenciava precar in terror. Io orava pro isto a finir.
Io habeva un impression que mi prece solmente faceva le situation pejor. Le susurros deveniva plus alte. Le voces semblava plus aggressive si illo ha senso.
Io habeva satis. Io me vestiva in vestimentos calde. Postea io compulsava si le plus importante cosas como claves e portafolio es a su loco. Le lampa de tasca cadeva ex mi mano quando io lo faceva.
Post preparar toto io cautemente moveva le clausura del tenta e reguardava al exterior – io videva nemo. Io partiva le tenta. Post solmente alcun passos io cadeva a terra.
“Merda!8” io exclamava.
Cordas del tenta. Io los oblidava. Io habeva facite un passo false.
Le ferimento non esseva multo forte, proque io cadeva a herba. Jacente io notava un scission in le tenta. Plus o minus 30 cm de longitude. Illo non habeva se trovate ibi anteriormente.
Io me sublevava e continuava le escappata. Io non habeva corage reguardar a lateres, solmente avante, tamen io non videva ulle personas. Io probava rememorar le direction ab le qual io habeva venite ibi. Illo non esseva facile in tenebras e anxietate.
Io curreva a traverso le foreste durante que ramos colpava mi facie e secava pelle. Sudor frigide ab terror e fatiga appareva a mi dorso. Io probava illuminar le via con le lampa de tasca e non cader a terra. Le riso ancora repercuteva in mi aures.
Io non memora como longemente io curreva. Probabilemente alcun quartos. Finalmente un aurora me attingeva. Calor de radices luminose ganiava mi facie. Io superviveva.
Post un tempore io attingeva un tracia arenose. Fortunatemente io non me perdeva. Io sequeva le tracia e ganiava mi automobile. Un carro con susurro alte me passava. Io nunquam habeva essite tam felice vidente altere homines.
Io entrava le automobile e accendeva le ingenio. Io voleva esser plus longe ab ille loco. Io percurreva alcun kilometros. Quando io me sentiva secur io stoppava le carro. Post alicun minutas io cadeva in somno ab fatiga.
***
Post ille nocte poc pilos gris appareva a mi capite. Io apprendeva que io habeva facite mi campamento in un vetule cemeterio de Gothos.
Quasi duo milles annos retro pagan Gothos erigeva ille circulo de lapides pro marcar un loco de interramento. Inter illos, illes interrava lor mortos, organisava incontros de tribos e faceva le Deo solmente sape que plus. Historicos dice que in le Medievo magas se incontrava ibi e exequeva lor rituales mysteriose. Isto es lo que io poteva trovar in le interrete.
Io probava ascoltar lo que se registrava ille nocte, ma il habeva nihil. Solmente sonos estranie resimilante craches e crepitationes.
Obviemente tu pote dicer que illos esseva sonos natural del nocte. Phonos9 facite per animales, crepitation de arbores etc., etc., ma io lo dubita. Io me fide a mi sensos e sape que io experiva.
Mi tenta ancora se trova in le clariera. Io non habeva corage vider iste loco itero. Il non debe adder que io nunquam pernoctava in un foreste singule de novo. Io ancora senti le terror de ille nocte malgrado que il passava multe annos ab ille eventos.
Illo es superbia considerar homines como creaturas le plus potente e intelligente in tote le mundo. Io nunc crede in cosas plus vetule e sinistre que homines. E io prefere evitar los.
1Un sacco ubi on porta su cosas durante excursiones.
2Un sacco in le qual un persona dormi in un tenta.
3Un coffro in le parte posterior de automobile ubi on porta cosas.
4Un area intra un foreste con herba e sin arbores.
5Un serpente gris que non es venenose.
6Le platte objecto sur le qual on dormi in un tenta.
7Non troppo grande animales simile a cervos.
8Excremento.
9Sonos.
.png)
